- Bəzi  insanlarda gözətrafı toxumada şişkinlik və gözətrafı dərinin rəngində  tündləşmə müşahidə edilir. Belə hallarda nədənsə insanlar ilk növbədə, böyrəyin fəaliyyətinin zəiflədiyini düşünürlər. Bildirmək istərdim ki, böyrək fəaliyyətinin gözətrafı toxuma ilə heç bir əlaqəsi yoxdur. Böyrəklər gün ərzində qəbul etdiyimiz mayenin 75-80%-ni sidik şəklində bədənimizdən xaric edir. Yəni gün ərzində  qəbul etməli olduğumuz ən azından 2 litr mayenin (bunun 80-90%-ni su təşkil etməlidir) 1,5 litrini sidik olaraq xaric edirik. Ağır dərəcədə böyrək çatışmazlığı olan xəstələrdə maye bədəndən xaric edilə bilmədiyi üçün bütün bədəndə ödem (şişkinlik) yaranır.

- Normal halda sidikdə qan olmamalıdır. Sidik ifrazat sisteminin bir çox xəstəlikləri (böyrək, sidik axarları, sidik kisəsinin daşları, sidik yollarının iltihabı, prostat vəzin böyüməsi və uroloji  orqanların xərçəngi) buna səbəb ola bilər. Ona görə də bu əlamat varsa, bunun səbəbi  mütləq araşdırılmalıdır.

- Xalq arasında peyğəmbər sünnəti olaraq adlandırılıb normal qəbul edilən vəziyyət əslində sidik kanalının bir anomaliyasıdır. Yəni sidik kanalının normal yerinə deyil, penisin  alt tərəfində hər hansı bir yerə açılmasıdır. Bu anomaliyanın müalicəsi yalnız cərrahi yolladır. Uşaq doğulandan 6 ay sonra ya uşaq cərrahına, ya da uroloqa müraciət etməlisininz. Bu xəstəlik vaxtında müalicə edilməzsə, bu uşaqlar sidik yolu infeksiyaları və gələcəkdə sonsuzluq kimi problemlərlə qarşılaşırlar.

- Varikosel xəstəliyi  hər iki  xaya toxumasından venoz qanı daşıyan damarlarda genişlənmə ilə müşahidə edilir. Beləliklə, venoz (çirkli) qanın toxumaya - xaya toxumasına geri qayıtması orada  yaranan spermatozoid hüceyrələrinin bir neçə mexanizm ilə fəaliyyətini zəiflədirlər. Nəticədə sonsuzluq problemi yaranır. Varikosel xəstəliyinin müalicəsi yalnız cərrahi müdaxilə ilə müalicədir. Mikroskopik varikoselektomiya əməliyatı  ilə bu problem tamamilə müalicə olunur.

- Böyrək daşları bir neçə çeşid tərkibə malikdirlər. Kalsium oksalat,  kalsium  fosfat, urat  sisitin  infeksiya  mənşəli  müxtəlif dərman preparatlarının çox istifadəsi ilə və s. tərkibli daşlar mövcuddur.
Sidik ifrazat sistemində  daşlar daha çox  böyrəklərdə sidik axarlarında, sidik kisəsində, az da olsa sidik kanalında  rast gəlinir. Daşın ölçüsü yerləşmə yerinə görə həm cərrahi, həm də digər metodlarla müalicə edilir. Daş xəstəliyinin profilaktikasında  dərman preparatları və ən əsası gündəlik 2 litr su istifadə edilməsi çox önəmlidir.