“Ümumdünya Böyrək Günü”-nə həsr edilmiş “Böyrək xəstəliklərinə multidissiplinar yanaşma” mövzusunda Elmi Konfrans keçiriləcək.
9 mart 2023-cü il tarixində Azərbaycan Respublikası Dövlət Gömrük Komitəsinin Tibbi Xidmət İdarəsinin Elmi-Təcrübi və Tədris Mərkəzinin, Mərkəzi Gömrük Hospitalının, “Akademik M.Cavadzadə adına Respublika Klinik Uroloji Xəstəxana PHŞ”-nin,” “Azərbaycan Nefroloqlar Cəmiyyəti” İctimai Birliyinin, “Nefrologiyanın İnkişafına Yardım” İctimai Birliyinin birgə təşkilatçılığı və “EGİS Pharmaceuticals PLC” şirkətlərinin ölkə nümayəndəliyinin dəstəyi ilə “Böyrək xəstəliklərinə multidissiplinar yanaşma” mövzusunda Elmi Konfrans həyata keçiriləcək.
Konfransda “Böyrək xəstəliyinin diaqnoz və təqibindəki yeniliklər”, “Xroniki böyrək xəstəliyi: Səbəb hər zaman böyrək deyil!” və “Xroniki böyrək xəstəliyinin uroloji səbəbləri”, “Böyrəkəvəzedici müalicələrdə müasir aspektlər” başlıqlı 4 paneldə ümumilikdə 17 məruzə təqdim olunacaq. Məruzələr müvafiq sahənin yüksəkixtisaslı mütəxəssisləri tərəfindən təqdim olunacaq, eyni zamanda dinləyicilərin sualları cavablandırılacaq və panel müzakirələr təşkil olunacaq.
Hərkəs üçün əlçatanlığı təmin etmək məqsədilə konfrans hibrid formatda həyata keçiriləcək.
Konfrans əyani şəkildə M.Cavadzadə adına Respublika Klinik Uroloji Xəstəxana PHŞ-nin akt zalında, distant olaraq isə ZOOM platformasında həyata keçiriləcək.
Proqrama uyğun olaraq konfrans nefroloq, uroloq, uşaq cərrahı, onkoloq, pediatr, cərrah, infeksionist, laborant, terapevt, radioloq, mama-ginekoloq, anestezioloq-reanimatoloq, kardioloq ixtisasına malik həkimlər və rezidentlər üçün nəzərdə tutulmuşdur.
- Konfransın akkreditasiya edilməsi üçün Səhiyyə Nazirliyinə müraciət edilmişdir.
- Konfransda iştirak ödənişsizdir!
- Yerlər məhdud olduğu üçün qeydiyyatdan keçmək MÜTLƏQDİR!
