"COVID 19: Erkən və Gecikmiş Fəsadlar" mövzusunda Beynəlxalq Elmi Konfrans keçiriləcək
20 noyabr 2021-ci il tarixində Dövlət Gömrük Komitəsi Tibbi Xidmət İdarəsi Elmi-Təcrübi və Tədris Mərkəzi, Mərkəzi Gömrük Hospitalı və Mərkəzi Gömrük Hospitalının rəsmi tərəfdaşı Florence Nightingale Xəstəxanalar Qrupunun birgə təşkilatçılığı ilə “18-24 noyabr Ümumdünya Antibiotiklərlə Bağlı Maarifləndirmə Həftəsi”nə həsr edilmiş "COVID 19: Erkən və Gecikmiş Fəsadlar" mövzusunda Beynəlxalq Elmi Konfrans keçiriləcək.
Hibrid formatda həyata keçirilməsi planlaşdırılan Beynəlxalq Elmi Konfransda “COVID-19: Erkən dövr fəsadları” və “COVID-19: Gecikmiş dövr fəsadları” başlıqlı 2 paneldə Azərbaycan və Türkiyədən olan yüksəkixtisaslı mütəxəssislər tərəfindən ümumilikdə 19 məruzə dinləniləcək. Konfrans panel müzakirələr və sual-cavab sesiyaları vasitəsilə interaktiv şəklində aparılacaq.
Konfransın proqramına uyğun olaraq infeksionist, ürək-damar cərrahı, terapevt, endokrinoloq, anestezioloq-reanimatoloq, nevropatoloq, fizioterapevt, radioloq, qastroenteroloq, nefroloq, oftalmoloq, dermatoveneroloq, psixiatr və pulmonoloq ixtisaslarından olan mütəxəssislər konfransda əyani şəkildə iştirak edə bilərlər.
- Konfransda əyani şəkildə iştirak edəcək şəxslərin COVİD-19 passportu və ya İmmun sertifikatının olması mütləqdir!
- Konfransa eyni zamanda hərkəs distant şəkildə ZOOM proqramı vasitəsilə də qoşula biləcək.
- Yerlər məhdud olduğu üçün həm əyani həm onlayn iştirak üçün qeydiyyatdan keçmək MÜTLƏQDİR!
- Proqramın 80 faizini tamamlayan hər bir iştirakçıya sertifikat veriləcək.
- Konfransda iştirak ödənişsizdir. Hərkəs konfransda iştirak üçün dəvətlidir!
